عاد هشام إلى المنزل وهو محمل بالهدايا؛ اشترى مجموعة فاخرة من الذهب والماس، وعلبة كبيرة من أرق الزهور، وأفخم العطور.
دخل الشقة العلوية، ثم نزل ببطء ووضع الهدايا أمام باب غرفة سدرة، وكتب ورقة صغيرة بخط يده قال فيها:
(سدرة.. أنا أسف عن كل حرف وكل شرط قالته شفتي.. الهدايا دي حاجة بسيطة تعبر عن ندمي، أرجوكِ اقبليها وافتحي صفحة جديدة مع واحد أتمنى يمسح دمعة واحدة نزلها بسببك).
في المساء، نزل هشام ليرى أثر رسالته والهدايا.
فوجئ بالعلب والزهور موضوعة كما هي فوق طاولة الصالة السفلى أمام والديه، وفوقها الورقة التي كتبها وقد كتبت هي على ظهرها بخط رقيق وجميل:
(أنا لا أُشترى بالذهب والورد، وما أفسده الكبر لا تصلحه الهدايا.. أنا لست صدقة لتتمنن عليّ باعتذارك).
كانت الكلمات كالصفعة على وجه هشام. وقف ينظر للورقة ومحسن يراقبه بنظرة عتاب شديدة:
– محسن: “أنا قلتلك يا هشام.. البنت دي عزيزة النفس، وتربية زينب الله يرحمها.. الفلوس والذهب ما يهموهاش في حاجة، يهمها الراجل اللي يحترمها ويصونها.”
– هشام وهو يتحدث بحزن ودموعه تخونه لأول مرة: “طب أعمل إيه يا بابا؟! أعمل إيه عشان تصدق إني ندمان؟! أنا مستعد أعمل أي حاجة عشان بس تسمعني أو تنطق اسمي!”
في اليوم التالي، حدث ما زاد نار الغيرة في قلب هشام واشتعلت الأمور أكثر.
زار فاروق بك وزوجته نيفين هانم العائلة مرة أخرى، وكان برفقتهم ابنهما شريف.
أثناء جلسة الشاي، بدأ شريف يتحدث بلباقة مع محسن وثريا، ثم فتح موضوعاً حساماً:
– شريف بجدية واحترام: “يا عمي محسن.. بصراحة أنا أصل العزومة اللي فاتت انبهرت جداً بأخلاق وجمال مدام سدرة، وعرفت من والدتي إن الجوازة دي كانت ظروفها غريبة شوية وإن هشام…”
قاطعه هشام بقسوة وشرارة الغضب تطاير من عينيه وهو يتقدم نحو المجلس:
– هشام بصوت كالرعد: “وإن هشام إيه يا سي شريف؟! سدرة مراتي! زوجتي على سنة الله ورسوله! أنت جاي تتكلم عن مراتي في بيتي ولا إيه؟!”
وقفت نيفين هانم وفاروق بك بذهول، وقام محسن بغضب:
– محسن: “هشام! اتعلم الأدب واعرف بتتكلم إزاي مع ضيوفك!”
– هشام وهو ينظر لشريف بنظرات حادة: “الضيوف على راسي.. لكن اللي يفكر يلمس خيال مراتي بكلام أو نظرة أقطعه! سدرة ملكي أنا ومحدش له دعوة بيها!”
– شريف بهدوء وكرامة: “أنا آسف يا هشام بك.. أنا ماكنتش أقصد أي إساءة، أنا بس سمعت إن الجوازة مش قائمة وإنك رافضها، فكنت بستفسر مش أكتر.. استأذنكم يا جماعة.”
انصرف فاروق بك وعائلته في حالة من الحرج، والبيت اشتعل ناراً.
– ثريا بغضب شديد: “أنت اتجننت يا هشام؟! إزاي تطرد الناس وتتكلم مع شريف بالأسلوب ده؟”
– هشام بعيون حمراء ودموع متصلبة: “أنا اتجننت فعلاً يا ماما! أنا مش هسمح لأي راجل في الدنيا يبص لها أو يفكر فيها! سدرة دي بتاعتي أنا وبس!”
– ثريا بأسى وسخرية: “بتاعتك؟ أنت نسيت إنك قلت مش عايز تشوفها وهتتجوز غيرها وهي هتعيش فوق وأنت تحت؟ نسيت الشرط الرابع اللي فرضته علينا؟”
– هشام يصرخ بأعلى صوته: “يلعن الشروط والأيام اللي فكرت فيها كده! أنا بحبها يا ماما! أنا بقيت مجنون بيها ومش شايف غيرها!”
خرجت سدرة من غرفتها على صوت صراخه العالي، وكانت ترتدي نقابها.
وقفت على مسافة مترين منه، تنظر إليه بجمود وصمت يتحديان ثورته.
عندما رآها هشام، سكت فجأة.
توقفت أنفاسه، واقترب منها بخطوات متوسلة أمام والديه، ونزل على ركبتيه أمامها على الأرض في مشهد صدم محسن وثريا كلياً!
هشام الشاب المغرور، ينزل على ركبتيه معتذراً!
رفع هشام عينيه الممتلئتين بالدموع والتوسل نحو عينيها من خلف النقاب:
– هشام بصوت يرتجف ويتقطع: “سدرة… أرجوكِ.. أنا قدامك أهو، كبريائي تحت رجليكي، وغروري اتكسر.. أنا ندمان، ندمان لحد الموت! العقاب ده أقسى عليا من الموت.. اتكلمي معايا، اضربيني، اشتميني، خدي حقك مني بأي طريقة.. بس ما تحرمينامش من صوتك ومن نظرتك! أنا والله العظيم بحبك وعايز أعيش أخدمك بقية عمري!”
ساد صمت رهيب في الصالة.
كان محسن وثريا يترقبان ردة فعل سدرة بذهول ونبضات قلب متسارعة.
نظرت سدرة لهشام وهو راكع تحت قدميها يتوسل المغفرة.
رفعت يدها ببطء شديد، وفكت رباط النقاب عن وجهها، ليتجلى وجهها الباهي الملائكي أمامه من جديد، والدموع تنزل كاللؤلؤ على جفنيها الناعمين.
التقطت أنفاسها، ولأول مرة منذ عقد القران، نطقت بصوتها الرقيق الكامل الممتلئ بمرارة الأيام السابقة:
– سدرة بنبرة حزينة وثابتة: “اللي اتكسر في قلبي يا هشام بك.. ما بتصلحوش دموع اللحظة دي.. أنت أهنتني في كرامتي وفي اسم أمي الله يرحمها، واستكترت عليا حتى كلمة طيّبة يوم عقد قراننا.. الزجاج لما بيتكسر، حتى لو اتجمع تاني، بيفضل معلم فيه ألف شرخ.”
– هشام وهو يمسك بطرف عباءتها برجاء: “أنا مستعد أقضي عمري كله أصلح في الشروخ دي يا سدرة! بس أديني فرصة واحدة.. فرصة واحدة أثبتلك فيها حُبي!”
