ابني متجوز بنت اخويا واختلف معاها وطردها بره البيت، ولما اتحايلت على اخويا ورجعتها اتفاجأنا بابني بيتجوز واحدة تانية في شقتها عشان يكسر خاطرها. أنا واخويا كنا هنقع من طولنا، بس العجيب كان رد فعل مراته وقتها.. عملت حاجة محدش توقعها خالص، خلت ابني يتمنى الأرض تنشق وتبلعه!
من يوم ما جوزي مات وسابني في الدنيا بطولي مع ابنه هاشم اللي مكملش عشر سنين، واخوات جوزي قفلوا الأبواب في وشنا وقالوا أبوه ملوش ورث عندنا وملناش دعوة بيكوا. ساعتها في الدنيا دي كلها ملقتش غير إيد واحدة اتمدتلي، إيد أخويا الكبير محمود.. سندي وستري بعد ربنا. كان هو الأب والعم والأخ، يخصم من قوت عياله ويديني عشان أعلّم ابني وألبسه، وما يحسش إنه أقل من حد. كان يشيل معايا اللقمة والهم، ويقولي: “طول ما أنا حي يا بهية، أنتي وابنك في رقبتي”.
ولما الولد كبر وبقى راجل، قلت في نفسي ده الوقت اللي أرد فيه جزء بسيط من جميل أخويا اللي فضله فوق رأسي. اقترحت عليه يتجوز نبيلة بنت أخويا، بنت أصول متربية على إيدي، جميلة ومتعلمة ومش هنلاقي في الدنيا دي أحسن منها. هاشم في الأول قعد يتحجج ويرفض، بس أنا فضلت وراه وأقنع فيه لحد ما وافق، وعملنا فرح يفرح القلوب.
والله شاهد عليا، البنت دي دخلت بيتنا كانت زي البلسم. رغم إنهم اتجوزوا في شقة بعيدة عني، إلا إنها كانت شايلاني على رأسها. لو عملت أكلة حلوة تبعتلي منها، وتجيلي تزورني وتسأل عليا وكأنها بنتي اللي ما خلفتهاش، وحبها في قلبي زاد وعلاقتي بأخويا بقت أقوى وأمتن.
بس الحلو ما يكملش.. ابني كان دايماً يخلق المشاكل من الهواء، ويتخانق معاها على أقل حاجة، وهي تحاول تعيش وتعديله.. لحد ما في يوم، الصبح بدري، اتفاجأت بأخويا بيكلمني وصوته مكتوم من الزعل، بيقولي إن ابني طلب من مراته تسيب البيت في نصاص الليالي!
اتصدمت ورحتله جري، وهناك عرفت الحقيقة المُرة.. البنت اكتشفت إنه على علاقة بغيرها في التليفون، ولما واجهته، بدل ما يستحي، طردها بره بيته!
أنا ساعتها أرض الله ما شالتنيش من الخجل من أخويا. اعتذرتله وأنا دمعتي على خدي، ورجعت لابني أكلمه وأعاتبه، لكنه رد ببرود وقالي: “دي بنت نكدية يا ماما، بتعمل من الحبة قبة!”. ولما واجهته بكلامه، نفخ وقال: “يوووه! هو احنا مش هنخلص؟ أنا أعمل اللي يعجبني، وانتي المفروض أمي أنا، مش أمها هي عشان طول الوقت تدافعي عنها كده!”.
ومرت الأيام، وأنا كل يوم أتحايل عليه، وأترجاه يلم بنت خاله ويرجعها بيتها، لحد ما مع كتر الضغط قال لي: “خلاص يا أمي، روحي هاتيها وأنا أوعدك هعاملها أحسن معاملة”.
جريت على أخويا وأنا طايرة من الفرحة، قعدت أتحايل عليه وأوعده بألف وعد إن الولد اتغير وندم. أخويا بصلي بأسى وقال: “يا بهية يا اختي، لو كلامك ده صح، كان جه بنفسه ياخد مراته”. كذبت عليه عشان أداري على خيبة ابني وأرضيه، وقلتله: “والله كان عايز يجي بنفسه، بس الشغل وراه كتير”.
أخويا اتنهد وقال: “أنا هاخد بنتي على إيدي وأروح معاكي، لو لقيت ابنك فعلاً اتغير وهيصونها هسيبهاله، ولو حسيت إنه زي ما هو، هاخد بنتي وأرجع.. ولولا خاطرك أنتي يا بهية، ما كنت وافقت أبداً”.
ومشينا.. وعلى الطريق كلمت ابني قلتله احنا في السكة وقربنا نوصل، قال بصوت جاف: “مستنيكم”.
أول ما حطينا رجلنا عند الشقة، سمعنا هيصة.. وصوت مزمار بلدي والستات بتبخ زغاريد! اتسمرنا مكانا لما شفنا المنظر.. ابني واقف عند الباب، وفي إيده عروسة تانية لابسة فستان أبيض، بيضحك معاها وبيهزر قدام الناس كلها!
أنا ركبي مشالتنيش، وكنت هقع من طولي وأخويا اتصدم صدمة عمره وبص لابني بذهول، كأنه مش مصدق إن ده الولد اللي رباه وسنده. أما نبيلة مراته، فكانت واقفة بصاله بذهول، عينها فيها ألف سؤال وسؤال، مش مستوعبة إنه بيعمل فيها كدة بدون سبب!
ابني أول ما شافنا واقفين، ابتسم بتكبر ونده على بتاع المزمار بصوت عالي وقال: “سمعني سلام.. تروح حشرة يجي غيرها عشرة!”.
أنا لطمت على وشي من الخجل، وأخويا عروه ظهرت وعنيه احمرت ولسه هيتقدم خطوة عشان يخدع وياخد حق بنته، بس نبيلة مسكت إيده ومنعته وقربت خطوتين بثبات غريب من هاشم ابني.. واللي قالته وقتها خلى المكان كله في حالة صدمة، وابني من شدة الذهول زق إيد عروسته، وكان هيفقد وعيه من المفاجأة وبتمنى الأرض تنشق وتبلعه!
وقفت نبيلة في نص الصالة، وسط الزغاريد اللي اتكتمت مرة واحدة والمزمار اللي سكت زي ما يكون صاحبه اتخرس. كان الهدوء اللي نزل على المكان يخوف.. عينيها كانت ثابتة، لا دمعة نزلت ولا جسمها اترعش، بل بالعكس، كان في وشها ثبات مرعب خلى هاشم يتردد ثانية، بس رجع نفخ صدره وابتسم ابتسامة سخيفة عشان يداري توتره.
قربت منه خطوتين، خطوات موزونة وثقيلة، لحد ما بقت واقفة قدامه بالظبط، بينه وبين العروسة الجديدة اللي كانت واقفة مش فاهمة حاجة وبتبص للموقف بذهول.
نبيلة بصت له من فوق لتحت، وبعدين دارت بعينها على المعازيم والمنطقة كلها اللي كانت واقفة تتفرج، وراحت باصة للعروسة الجديدة وقالت بصوت عالي، رنان، يسمعه الأطرش:
“ألف مبروك يا عروسة.. مبروك عليكي الراجل! بس يا ترى قبل ما تلبسي الأبيض وتفرحي بيه، قالك على سرنا اللي عرفناه عند الدكتور؟ ولا خبا عليكي زي ما خبا على الدنيا كلها؟”
هاشم ألوان وشه اتغيرت في لحظة، الابتسامة اختفت واتحولت لصفار زي الميتين، عينيه اتوسعت برعب ونفض إيد عروسته وقال بصوت متلجلج ومكتوم:
“أنتي.. أنتي بتقولي إيه يا بت أنتي؟ اتجننتي؟!”
نبيلة ابتسمت ابتسامة وجع مخلطة بتهكم، وبصت للعروسة تاني وقالت بكل برود:
“بقولها الحقيقة اللي أنا عشت أداري عليها سنة كاملة وأحمي ظهره وأرفعه قدام الناس.. أصل الأستاذ اللي واقف فرحان بنفسه ده، الدكتور قالنا في وشنا إن عيبه ملوش علاج، وإنه مستحيل يخلف! وأنا العبيطة الهبلة، خبيت عن أهلي وعن أمه وعن الدنيا كلها، وقلت بلاش أكسر راجلي قدام الناس، بلاش أخليه يوطي رأسه.. وكنت بقول معلش، ربنا هو الرزاق ونعيش لبعض.. بس يلا، أهو ربك بالمرصاد، وجاي يوريني خيري اللي أثمر في شوك!”
العروسة الجديدة اتصدمت، مسكت في إيد هاشم وهي بتبصله بذهول وصراخ:
“إيه الكلام ده؟! الكلام ده حقيقي ولا البت دي غيرانة مننا.. انطق يا هاشم؟!!”
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
