جريت في الشارع زي المجنون، المطر بيضرب في وشي والأرض بتتزحلق تحت رجلي، مش شايف قدامي غير جثتها المرمية على الإسفلت المبلول والكرتونة المتغرق أوراقها جنبها. وصلت عندها في ثوانٍ، رميت نفسي على الركبي في الشارع، وسحبتها من الأرض وحضنتها بكل قوتي.. الحضن اللي انحرمت منه سنة كاملة، الحضن اللي كنت بموت عشان ألمسه!
أنا بصراخ وبكاء هيستيري: “بنتي! قومي يا حبيبتي.. قومي يا قلب أباك! سامحيني يا رب، يا رب ما تاخدهاش مني، قومي عشان خاطري!”
كانت ساقعة زي الثلج، وشها أصفر زي الموت، وعينيها مقفولة تماماً. جسمها كان خفيف جداً في إيدي، كأني شايل ريشة، مش دي البنت اللي كانت مليانة صحة وحيوية في بيتي. مسكت وشها بإيديا اللي بترتعش، بقيت أبوس في جبينها وفي إيديها وفي شعرها المبلول بالمية، وأنا بصصرخ وبطلب المساعدة من أي حد في الشارع.
صاحب المكتبة خرج يجرِ على الصوت، ولما شافني ماسكها وبصرخ، اتخض وقال: “في إيه يا حاج؟! أنت مين؟! ابعد عنها!”
صرخت فيه والدموع مالية عيني: “أنا أبوها! الحقني يا بني، بنتي بتموت في إيدي! اطلب إسعاف بسرعة!”
الراجل اتصدم، وجري يجيب عربية. شلتها بين إيديا، وما كنتش مصدق إني شايلها تاني، بس المرة دي مكانتش طايرة من الفرحة وهي راجعة من مدرستها، المرة دي كانت غايبة عن الوعي ومجهدة لدرجة تخوف. دخلناها عربية صاحب المكتبة، وطار بينا على أقرب مستشفى حكومي في المحافظة.
طول الطريق، كنت ماسك إيدها الصغيرة الباردة، بضغط عليها وأحطها على قلبي، وأتوسل لربنا في سري: “يا رب خذ عمري واديلها، يا رب عقابك ليا كان كبير، بس بلاش هي.. بلاش تحرمني منها للأبد.”
وصلنا المستشفى، الدكاترة والممرضين جُم جري وسحبوها مني على التروللي، ودخلوها أوضة الطوارئ وقفوا الباب في وشي. قعدت على الأرض برة الأوضة، ضهري مفرود على الحيطة الساقعة، وهدومي مبلولة بتشر مية ومطر، وأنا بضرب راسي في الحيطة وببكي بصوت جاب كل اللي في الممر حواليا.
صاحب المكتبة جه وقعد جنبي، حط إيده على كتفي وقال باستغراب: “أنت أبوها بجد؟ البنت دي شغال معايا بقالها شهور، كانت بتقول إن ملهاش حد في الدنيا غير خالها، وكانت بتتعب وتقاوم وتقول لازم أعتمد على نفسي! أنت فين من زمان يا حاج؟ البنت دي كانت بتاكل لقمة ناشفة وبتنام أربع ساعات بس في اليوم عشان توفق بين دراستها وشغلها!”
كل كلمة كان بيقولها كانت بتنزل عليا زي ضربات الساطور. قفلت عيني وما قدرتوش أرد.. أقوله إيه؟ أقوله إني أنا اللي طردتها؟ إني أنا اللي بعتها عشان وحدة حية أكلت عقلي؟
بعد ساعة طويلة مرت كأنها ألف سنة، خرج الدكتور من الأوضة وهو بيمسح عرقه. اتنطرت من على الأرض ومسكت في بالديكتار: “طمني يا دكتور! بنتي جرالها إيه؟! أرجوك قولي إنها كويسة!”
الدكتور بصلي بأسى وتنهد: “هي عندها هبوط حاد في الدوره الدموية، وأنيميا شديدة جداً وصلت لمرحلة الخطر، ده غير إرهاق عصبي وبدني كامل. البنت دي مش بتاكل يا حاج، وجسمها مستهلك تماماً. احنا علقنا لها محاليل وأكياس دم، والحمد لله لحقناها في أخر لحظة.. بس هي محتاجة راحة تامة واهتمام، وإلا قلبها مش هيستحمل المجهود ده تاني.”
نزلت على ركبي في الممر وسجدت لله وأنا بعيط وبقول: “الحمد لله.. الحمد لله يا رب إنك ما حرمتنيش منها.”
الدكتور كمل كلامه: “هي بدأت تفوق دلوقتي، تقدر تدخل تشوفها.. بس بلاش أي توتر.”
قمت بخطوات تقيلة، إيدي كانت بترتعش وأنا بفتح باب الأوضة. كانت قاعدة على السرير، المحاليل متوصلة في إيدها، ووشها باهت تماماً. أول ما باب الأوضة اتفتح وشافتني واقف على الباب.. عينيها وسعت، والملامح الهادية اللي على وشها تحولت في ثانية لصدمة ورعب!
قعدت أتطلع فيها وأنا مقدرش أقف، مشيت ناحيتها بخطوات متقطعة، والدموع مغرقة وشي: “حبيبتي.. ألف سلامة عليكِ يا قلب أباكِ.”
أول ما سمعت صوتي وشافت منظري المبهدل وهدومي المبلولة، وشها اتقلب تماماً. مكانتش نظرة حنان ولا ضعف.. كانت نظرة غضب وقسوة وجع في نفس الوقت. سحبت إيدها اللي فيها المحلول بعيد عني، وبصتلي بصوت جاف طالع بالعافية من زورها المبحوح:
“أنت إيه اللي جابك هنا؟ أنت بتلاحقني ليه؟”
أنا بانهيار، وقعدت على الكنبة اللي جنب السرير وحاولت أمسك إيدها: “أنا كنت خايف عليكِ يا بنتي! أنا ماشفتش قدامي لما وقعتي في الشارع.. أنا عايش سنة كاملة بموت في اليوم ألف مرة! ارجوكِ يا حبيبتي سامحيني، أنا طلقت سميرة من أول يوم، أنا بعت الشقة ونزلت أدور عليكِ في كل شبر.. أنا تحت رجليكِ، اعملي فيا اللي أنتِ عايزاه بس بلاش النظرة دي!”
بصتلي بثبات مرعب، ودمعة واحدة بس نزلت من عينها، مسحتها بسرعة وقالت ببرود أشد من الثلج:
“أنت فاكر لما تطلقها أو تجيلي هنا مغرق نفسك مطر، إني هنسى؟ فاكر إني هجري في حضنك وأقولك حصل خير يا بابا؟ القلم اللي أخدته منك يا محسن بيه، ما كانش على وشي.. كان على كرامتي وعفتي. أنت صدقت فيها إن بنتك مش متربية، ضربتني قدام أختها عشان ترضيها، وسيبتني محبوسة ثلاث أيام من غير أكل ولا مية ولا حتى خبطت عليا تسألني أنا حية ولا ميتة!”
أنا بصرخ وبترجاها: “كنت أعمى! الشيطان عمى قلبي وعقلي، والله العظيم كنت غبي ومخدوع! حقك عليا.. اضربيني، خدي حقك مني بالقلم وبالجزمة، بس بلاش ترميني برة حياتك كده!”
ردت بنبرة خلت قلبي يتفتت لمليون حتة: “أنا مش هضربك، ولا ههينك.. لأنك في الأول والأخر أبويا، وأنا أتربيت على إني أتعامل بأصلي مش بأصل غيري. بس أنت بالنسبة ليا بقيت غريب. وجودك هنا بيخنقني، وبيفكرني بأبشع أيام حياتي. أنت طردتني من بيتك وقعدت تصالح في اللي أهانت أومي.. ودلوقتي أنا بطلب منك تخرج من حياتي. أخرج يا بابا.. وسيبني أعيش اللي فاضلي بكرامتي.”
صرخت بحسرة: “أنا مش هسيبك هنا تشتغلي وتتبهدلي في الشوارع وأنا عايش! أنتِ بنتي الوحيدة، أنا هقعد تحت رجليكِ هنا في المحافظة دي، هشتغل أي حاجة جنب سكنك، بس أشوفك من بعيد وأطمن عليكِ!”
في اللحظة دي، طق الخرطوم بتاع المحلول من إيدها وهي بتقوم تقعد بالعافية، وصوتها علي لأول مرة بغضب رهيب:
“لو ما مشيتش دلوقتي وحلفت إنك ما هتعرف طريقي تاني، أنا هسيب الجامعات كلها وهسيب المحافظة وهختفي في مكان محدش يعرفه.. حتى خالي أحمد مش هخليه يعرف طريقي! أنت عايز تصدمني تاني؟! عايز تخليني أهرب في أنصاص الليالي تاني وأنا جسمي بالضعف ده؟! غور من قدامي يا أخي! سيبني في حالي بقى!”
الكلام نزل عليا كأنه صاعقة. الدكاترة والممرضين دخلوا يجروا على صوت صراخها والدم اللي بدأ ينزل من إيدها مكان الخرطوم. الدكتور مسكني وبدأ يزقني لبرة الأوضة بحدة: “أنت بتعمل إيه يا حاج؟! البنت حالتها حرج وممكن تخش في أزمة قلبية! اطلع برة فوراً!”
كنت بتبصلي بانهيار وهي بتبكي بكاء هستيري وبتقول للممرضة: “طلعوه برة.. مش عايزة أمد إيدي على حد ولا تشوف وش حد من الماضي!”
