في اليوم التالي:
– ثريا: “قوم يا محسن، أنت ناسي إحنا عندنا فرح؟”.
– محسن: “فرح إيه يا ثريا؟ إحنا هنضحك على بعض؟”.
– ثريا: “مين قال إني هضحك عليك؟ هعمل فرح لبنت لازم تفرح، كفاية عليها حزن”.
– محسن: “بس يا ثريا أنتِ عارفة هشام”.
– ثريا: “هشام كده كده مش معترف بالجوازة دي، خلاص سيبني أعمل اللي أنا عايزاه”.
– محسن: “طيب إحنا هنطلبها من مين؟”.
– ثريا: “في واحد قريبهم من بعيد اسمه أحمد هو هيجوزها لهشام”.
– محسن: “اشمعنى ده اللي تعرفيه؟”.
– ثريا: “ده الراجل اللي كان مع زينب في المستشفى ولما سألتها قالتلي إنه هو اللي بيسأل عليهم، علشان كده أنا اتصلت قلتله”.
– محسن: “ماشي، يلا بينا”.
– ثريا: “جاهز يا هشام؟”.
– هشام: “أيوه”.
– محسن: “إيه ده يا بني؟ أنت لابس إيه؟”.
– هشام: “عادي، حلو كده”.
– محسن: “روح إلبس بدلة يا هشام”.
– هشام: “لا، هو ده اللي عندي ومش هلبس غير كده”.
– ثريا: “خلاص خلاص يلا”.
– هشام: “يارب ما تنسوش، أنا مش عايز أشوفها”.
– محسن: “يلا اتأخرنا”.
نزل محسن وثريا ركبوا العربية ولسه هيمشوا:
– هشام: “استنى يا بابا”.
– محسن: “لا هات عربيتك”.
– هشام: “ولزمتها إيه؟ عربية واحدة كفاية”.
– ثريا: “يا بني علشان عروستك تيجي راكبة معاك”.
– هشام: “لا، لا يمكن!”.
– محسن: “اتحرك يا هشام! اخلص أنا صابر عليك من الصبح!”.
محسن وثريا طلعوا بالعربية وهشام طلع بعربيته.
– ثريا: “أظن الشارع الجاي”.
– محسن: “بصي شوفي هشام وراءنا بالعربية؟”.
– ثريا: “أيوه”.
– محسن: “طيب أنا هركن هنا انزلي أنتِ”.
وصلوا البيت:
– عم أحمد: “أهلاً وسهلاً اتفضلوا”.
– محسن: “أهلاً بحضرتك”.
– عم أحمد: “انتوا منورين”.
– ثريا: “ده نورك يا عم أحمد”.
– محسن: “ندخل في الموضوع؟”.
– أحمد: “اتفضل”.
– محسن: “إحنا عايزين… والله ما أنا عارف أقول إيه”.
– ثريا: “قولي يا عم أحمد هي العروسة اسمها إيه؟”.
– عم أحمد: “انتوا مش عارفين اسمها؟!”.
– محسن: “في الحقيقة إحنا جايين حسب وصية زينب لينا”.
– ثريا: “زينب الله يرحمها موصياني على بنتها، وبصراحة زينب كانت غالية عليا جداً، وده أقل حاجة أعملها علشان تستريح”.
– عم أحمد: “انتوا ناس محترمين مافيش زيكم في زماننا ده”.
– محسن: “هي العروسة اسمها…”.
– هشام: “يا صلاة النبي! انتوا كمان مش عارفين اسمها؟!”.
– ثريا: “اسكت يا هشام!”.
– عم أحمد: “العروسة اسمها سدرة”.
– محسن: “الله! اسمها جميل”.
– هشام: “يلا كفاية اسمها”.
– ثريا: “طيب ممكن نشوفها؟”.
– عم أحمد: “طبعاً”.
– هشام: “أنا قلت مش عايز أشوفها وده كان شرطي”.
– ثريا: “يا بني وطّي صوتك، الراجل هيسمعك!”.
– عم أحمد: “خلاص هطلب المأذون”.
– محسن: “طيب مش لما نتفق على كل حاجة؟”.
– عم أحمد: “انتوا بتاخدوا اللي أغلى من الدهب والفلوس، وأنا واثق إنكم هترعوا ربنا فيها”.
– محسن: “على بركة الله”.
– هشام: “خلاص كده؟”.
– محسن: “ممكن أسألك سؤال يا عم أحمد؟ هي العروسة شكلها إيه؟”.
– أحمد: “مش انتوا رفضتوا تشوفوها؟”.
– محسن: “سؤال وخلاص”.
– أحمد: “اللي يشوف سدرة يقول هي زينب كلها في احترامها وحنيتها”.
– محسن: “خلاص يا عم أحمد، تقريباً عرفت”.
– هشام بصوت واطي: “شفتي يا ماما؟ أها طلعت زي زينب بالظبط!”.
– عم أحمد: “أنا هنادي على سدرة.. اتفضلي يا بنتي”.
– هشام: “إيه ده؟ هي عاملة كده ليه يا ماما؟”.
– ثريا: “أنا ماكنتش أعرف إنها بتلبس كده”.
– هشام: “بس كده أحسن”.
– عم أحمد: “اكشفي وشك يا سدرة”.
– هشام: “لا مافيش داعي”.
– محسن: “ليه يا هشام يا بني؟ لازم نشوفها”.
– عم أحمد: “إيه يا جماعة في إيه؟”.
– ثريا: “لا أبداً، أصل زينب ما قالتش إن بنتها منقبة”.
– عم أحمد: “لا يا ست هانم، سدرة منقبة من زمان”.
– محسن: “خير، النقاب مش وحش”.
– هشام: “كده حلو أوي”.
– عم أحمد: “خلاص نتوكل على الله”.
وصل المأذون، وقبل عقد القران ردّد عم أحمد وهشام الكلام وراء المأذون.
– المأذون: “ألف مبروك”.
– ثريا: “مبروك يا هشام”.
– هشام: “مبروك على إيه إن شاء الله؟”.
– محسن: “في إيه يا هشام؟”.
– هشام: “أنا عملت اللي أنت عايزه مني، كده براءة”.
سدرة ابتدت تلاحظ إن هشام مش عايز الجوازة، وسكتت بعدما كانت فاكرة إنه موافق، ودموعها نزلت تحت النقاب.
– ثريا: “يلا يا هشام هات عروستك”.
– هشام: “يلا بينا بلاش كلام كتير!”.
– محسن: “وطي صوتك واحترم نفسك، وروح هات عروستك يلا”.
راح هشام ووقف جنب سدرة وقالها: “يلا”، فمشيت معاه من غير كلام.
– ثريا: “يعني ينفع اللي ابنك بيعمله ده يا محسن؟”.
– محسن: “أنا هعمل إيه؟ هو كل حاجة غلط من الأول”.
سلموا على عم أحمد ونزلوا. محسن ركب مع ثريا، وهشام ركب عربيته ودورها من غير ما يقول لسدرة تركب. هشام شافها واقفة ولسه مركبتش، كان عايز يسيبها ويمشي بس خاف من ثريا، فقالها:
– “إيه؟ هتجي البيت ماشية؟”.
سدرة كانت زعلانة أوي، وجت تركب جنبه فقالها تركب وراء، وركبت وطلع بالعربية بسرعة وعصبية.
وصلوا البيت، نزل هشام وساب سدرة ودخل.
– محسن: “فين عروستك؟”.
– هشام: “ماتقولش عروستك! وبعدين إيه اللي انتوا عاملينه ده؟ انتوا عاملين فرح؟!”.
– ثريا: “كفاية بقى يا هشام، أنا أعصابي تعبت”.
– محسن: “فين البنت يا هشام؟”.
– هشام: “هي كانت عايزاني أعمل إيه أكتر من كده؟ أنا وصلتها، هي ما نزلتش من العربية”.
– ثريا: “اطلع يا محسن هات البنت”.
– محسن: “الله يسامحك يا هشام!”.
طلع محسن ولقى سدرة واقفة جنب العربية ومش عارفة تروح فين.
– محسن: “إيه يا سدرة ما دخلتيش مع هشام ليه؟”.
– سدرة بصوت هادئ: “آسفة يا عمي”.
خدها محسن ودخلوا. كانوا عاملين فرح بسيط علشان يفرحوا سدرة، بس طبعاً هشام ما حضرش.
