إبراهيم بصوت مرتعش ومكسور:
— محمود.. الكلام ده صح؟ انت كنت تعرف ندى قبلي؟ وانت اللي عملت فيها كده وجاي النهاردة بيتي بتهددها؟
محمود حاول يلم الموضوع ويتلعثم:
— يا إبراهيم افهمني.. الموضوع مش كده خالص، هي بتهول و…
وقبل ما محمود يكمل كلمته، إبراهيم مسكه من ياقة قميصه بقوة رهيبة وعينيه مليانة دموع غضب وخيانة، وزقه ناحية الباب وهو بيصرخ فيه:
— برة! اطلع برة بيتي يا خاين يا واطي! أنت مش صاحب ولا أخ.. أنت أحقر إنسان أنا شفته في حياتي!
طرد إبراهيم محمود برة الشقة وقفل الباب في وشه بصوت هز العمارة كلها. وقف محمود في الصالة الضيقة برة، وحيد، مكسور، وكل الغرور والكبرياء اللي كان حاسس بيه اتمسح في ثانية واحدة.
وفي الداخل، مسك إبراهيم إيد ندى اللي كانت بتعيط، وقعد جنبها وهو بيقولها: “أنا أسف إن دخلت الأشكال دي حياتنا.. بس أنتِ كبرتي في نظري أكتر عشان كنتِ شجاعة وما خفتيش منه”.
خرج محمود للشارع، الضلمة كانت محوطاه من كل ناحية، والندم الحقيقي والأول في حياته بدأ يأكل في قلبه.. اكتشف إن الأنانية والغرور ما بيخلفوش غير الخراب، وأن الماضي اللي افتكر إنه ، رجع ودمر كل حاجة حلوة في حياته.
#الكاتب__رومانى__مكرم__
خرج محمود من العمارة وهو حاسس إن الشارع كله بيلف بيه. الهواء البارد كان بيخبط في وشه، بس النار اللي جوا كانت قايدة وبتأكل في صدره. مش من الحسرة على ندى، لكن من طعم الهزيمة والمرارة. الكبرياء اللي عاش يبنيه سنين اتكسر في لحظة واحدة قدام الكل. إبراهيم صاحبه وأخوه، الشخص الوحيد اللي كان بيلجأ له لما الدنيا تقفل في وشه، طرده زي الكلب وقفل الباب في وشه، والسر اللي كان مفكر إنه ماسك بيه رقبة ندى، بقى هو السكين اللي اتذبح بيه غروره.
قعد محمود على رصيف الشارع البعيد عن العمارة، يمسح العرق اللي كان نازل على جبهته رغم برودة الجو. مسك تليفونه، وبص على اسم إبراهيم، جرب يرن عليه مرتين.. المرة الأولى التليفون رن لحد ما قفل، والمرة الثانية أداه “المشترك الذي طلبته غير متاح”. إبراهيم حظره.
فتح الرسائل وشاف المحادثات القديمة مع ندى، الكلمات اللي كان فاكرها كروت قوة يلعب بيها، بقت قدام عينيه شواهد على خسته ودناءة تفكيره. في لحظة طيش وغضب من نفسه، مسح المحادثات كلها، مسح الأرقام، وكأنه بيحاول يمسح القرف اللي حاسس بيه، بس الصورة الذهنية لندى وهي بتواجهه بشجاعة قدام العيلتين، ولإبراهيم وهو بيزقه برة الباب بعيون مليانة كره وقرف، كانت محفورة في عقله ومش هتمشي.
روّح محمود بيته، كانت الأوضة ضالمة وساكتة زي القبر. رمى نفسه على بالهدوم اللي كان لابسها، ومجاش لنومه عين. كل ما يغمض، يسمع صوت إبراهيم وهو بيصرخ فيه: “أنت أحقر إنسان أنا شفته في حياتي!”. الكلمة كانت بترن في ودنه زي أذان .
مرت أيام، ومحمود محبوس في أوضته، مابيروحش الشغل ولا بيكلم حد. حاول يبعت ناس لـإبراهيم عشان يوضح له، أو على الأقل يطلب منه يسامحه على الخيانة، بس إبراهيم قفل كل الأبواب، وغير خط تليفونه، وقطع أي خيط ممكن يربطه بـمحمود.
بعد أسبوعين، محمود كان قاعد في كافيه بعيد عن منطقته، دبلان ووشه شاحن، بقى إنسان تاني تماماً. وفجأة، شاف واحد من أصحابهم المشتركين، اسمو “أحمد”، دخل الكافيه وقعد جنبه بعد تردد.
محمود بص له بلهفة وشوق لمعرفة أي خبر:
— أحمد.. أنت بتشوف إبراهيم؟ كويسين؟ الفرح لسة في ميعاده ولا…؟
أحمد بص لمحمود بنظرة عتاب وشفق، وحزّ رأسه بأسى وقال:
— إبراهيم كتب كتابه على ندى الأسبوع اللي فات يا محمود.. عملوا فرح صغير واقتصر على العيلتين.
محمود بلع ريقه بصعوبة، وحس بغصة في حلقة:
— و… وإبراهيم؟ جاب سيرتي؟ قال عني حاجة؟
أحمد حط إيده على كتف محمود وقال بنبرة حازمة:
