طليقي عزمني على فرحه بعد طلاقي بشهرين، ولما روحت الفرح هو وامه اتهموني إني بحاول أرجعله وجاية أخطفه من عروسته، وقتها شاورت على أول شاب وقعت عليه عيوني وقلتلها: أنا جاية مع خطيبي، القاعة كلها انفجرت بالضحك وأنا كنت هقع من طولي لما عرفت مين الشاب اللي شاورت عليه!!!!
شهرين عدوا على طلاقي.. شهرين وأنا بحاول ألملم اللي فاضل مني ومن كرامتي اللي اتهانت تحت جزمة حماتي. الست دي كانت بتتفنن في إهانتي وذلي، وطليقي حازم كان دايمًا معجب بجبروت أمه وقسوتها، وبيعاملها كإنها ملاك مبيغلطش، وعمره في يوم ما وقف في وشها ولا خدلي حقي ولا حتى جبر بخاطري بكلمة. ولما فاض بيا الكيل أخدت بنتي “جودي” -اللي عندها ٥ سنين- ومشيت، وكل اللي في دماغي أنفد بجلدي أنا وبنتي من البيت ده.
وتم الطلاق بسرعة وبدون تلاكيك ولا حوارات.
وفجأة بعد شهرين من طلاقي لقيت تليفوني بيرن.. رديت ولقيت صوته هو. بكل برود الدنيا بيقولي إنه كتب كتابه وهيعمل الفرح كمان يومين، وعازمني! قال إيه عشان يبدأ صفحة جديدة ويبقى بينا معروف. طبعًا أول رد في عقلي كان إني أهزأه وأقفل السكة في وشه، بس هو كمل بمسكنة ولؤم حافظاه كويس: “أنا كل اللي طالبه إن بنوتي تحضر فرحي وتشوفني.. بس يعني لو الموضوع ده هيجرحك وهيزعلك إنك تشوفيني بتجوز غيرك، خلاص يا ستي مفيش داعي تزعلي نفسك عشانا”.
فهمت لعبته على طول.. كان قاصد يغيظني ويحسسني إني مجروحة وميتة عليه. مسكت نفسي بالعافية، وضغطت على أسناني وقلتله بنبرة هادية جدًا وباردة: “مبروك يا حازم.. وأكيد هاجي وأجيبلك بنتك تشوفك، ومتقلقش عليا لأن جوازك أو عدمه مبقاش يفرقلي في حاجة ولا يهز شعرة مني”.
يوم الفرح، لبست وأخدت جودي في إيدي ودخلت القاعة. أول ما دخلت اتفاجأت.. القاعة كلها كانت متصممة بنفس الألوان والديكورات اللي أنا طول عمري بحلم بيها، واللي حكيتله عنها زمان قبل فرحنا واتحايلت عليه عشان يعملها، وقتها رفض وقاللي “ماما اختارت حاجات تانية وأنا مش هكسر كلمتها”. ابتسمت بسخرية وتريقة.. أنا فاهمة الحركات الباردة دي كويس، هو فاكر إنه بكده بيحرق دمي، بس الحقيقة هو كان بيفكرني بقلة حيلته قدام أمه زمان!
قربت من الكوشة وأنا ماسكة إيد بنتي عشان أسلم وأسيبله البنت، بس لقيت تصرفه مقرف زي عادته.. بصلنا بذهول وتصنع وقال بصوت عالٍ كأنه محدش عزمني: “إيه ده؟! أنتِ إيه اللي جابك هنا؟ هو أنا وحشتك ولا إيه؟”.
قبل ما ألحق أرد، اتدخلت أمه في الكلام: “لا يا عبيط.. دي جاية تعمل مشكلة طبعًا عشان تخطفك من عروستك! أكيد هتفطس من غلها لما عرفت إنك بتتجوز خلاص وسبتها”.
بصيتلهم بذهول وقلت وأنا مش مصدقة كمية الرخص: “أنت اللي عزمتني على فكرة ورنيت عليا!”.
ضحك بصوت عالٍ قدام الناس وقال: “وده حصل امتى ده في أحلامك؟ الظاهر كده إنك جاية وميتة عشان سبتك وبتجوز غيرك، ومش قادرة تستوعبي”.
ردت أمه بغل: “حقودة طول عمرها.. وأصلًا باينة من وقت ما طلقتها وهي هتموت عليك وترجعلك بأي طريقة”.
وهنا اتدخلت العروسة في الخط، وبصتلي بقرف وقالت: “خلاص يا حبيبتي، هو بيتجوز دلوقتي سيبيه في حاله وخلي عندك شوية كرامة.. مكانش له لزوم يعني تجيبي البنت في موقف زي ده عشان تتسولي بيها وتستعطفيه!”.
في اللحظة دي، الدم غلى في عروقي.. اتغيرت ملامحي وحسيت بغضب رهيب من نفسي.. غضب إني صدقته وجبتله بنته لحد عنده واديتهم فرصة يذلوني قدام المعازيم. لقيت نفسي بتكلم بدون تفكير وبصوت عالٍ: “أنتو بتقولوا إيه؟! ده اللي أنتم بتحلموا بيه وبس! أنا اللي طلبت الطلاق منه ورفعت عليه قضية ودست عليه، وجيت هنا بس عشان البيه اللي فاكر نفسه راجل كان هيموت ويشوف بنته!”.
أمه ضحكت بسخرية وقالت: “بطلوا كذب بقى… ما تقولي انك مش لاقيه اللي يعبرك وجايه تتمحكي عشان ترجعيه يعني حبكت يشوف بنته في الفرح!”.
الإهانات كانت طالعة زي السهام، وحسيت بنظرات المعازيم ووشوشتهم.. خلاص كنت هفقد أعصابي، ولقيتني برد بجنون وبدون تفكير عشان أرد كرامتي المهدورة: “ده اللي ابنك قاله واترجاني عشان أجي! أنا أصلًا مبقاش يهمني ابنك ولا فارقلي فرحه ولا الهوا.. لأني.. لأني أصلًا مخطوبة وجاية مع خطيبي هنا!”.
الكل سكت ووقف يتفرج.. لقيت نفسي بلا وعي ببص قدامي وشاورت على أول شاب لمحته قاعد على طاولته وراهم، قاعد لوحده ومش مدي أي اهتمام للزيطة دي كلها، وقلت: “خطيبي أهو.. قاعد على الطاولة اللي وراكي دي!”.
الكل التفت وراهم عشان يشوفوا أنا بشاور على مين.. وثواني معدودة، والقاعة كلها انفجرت في ضحك هستيري مش طبيعي! المعازيم كانوا بيمسكوا بطونهم من الضحك، وطليقي وأمه بصلولي بذهول وضحك متواصل، وأنا واقفة في نص القاعة مش فاهمة في إيه.. بيضحكوا ليه؟!
بصيت للشاب اللي شاورت عليه.. لقيته قاعد مصدوم ومش مستوعب اللي أنا هببته.. وأول ما عرفت هو مين فهمت ليه الكل بيضحك وقتها كنت هطب من طولي.. واتمنيت لو الأرض تتشق وتبلعني!!!!!
