بنتي اتطلقت وجات تعيش معايا وكان معاها عيل ٣ سنين ، قولتلها اني مش هقدر على مصاريفهم وطلبت منها تسيب الولد لابوه، لكن مسمعتش كلامي ورفضت تسيبه، ولما تعبت من المحاوله معاها اخدت الولد ووديته لابوه بس اللي حصل بعدها هد حياتي واتمنيت التراجع على اللي عملته !!!
بعد سنين من الإهانة والمرارة بنتي قدرت تطلق اخيرا. كانت عايشة مع أهل جوزها اللي معاملتهم كانت قاسية، وجوزها ملوش كلمة مع أمه، أي حاجة تقولها أمه يرجع يطبّقها على بنتي بالضرب والإهانة. لحد ما فاض بيها الكيل وحصلت المشكلة الكبيرة، ورمى عليها اليمين وطردها برة البيت.
المشكلة إنها مكنتش لوحدها، كان في إيدها ابنها اللي عنده ٣ سنين. لما طلبت منه يراعي ربنا ويأمن للولد مكان يعيش فيه أو يبعتلها أي قرش يصرف عليه، رد عليها بقسوة: “أنا أخري معاكي مؤخرها وعفشها والعيل ده، أنا مش ناقص وجع دماغ، ولو مش عاجبك ارفعي قضايا ودوري في المحاكم.”
بنتي سمعت الكلمتين وسكتت، وما قدرتش ترفع قضايا ولا تروح لمحامين، ولمت حاجاتها وجاتلي والكسرة مالية عينها، وشارية ابنها على دراعها.
من أول يوم طلاق والدم بيغلي في عروقي اكتر منها. الدنيا إزاي يرميها كدة ويستقوى عليها؟ وإزاي يستخسر في ابنه اللقمة؟ واللي زاد وغطى، إني عرفت إنه بعد الطلاق بأسبوعين بس، راح خطب وبيجهز شقة تانية عشان يتجوز ويعيش حياته ولا كأن حاجة حصلت!
بقيت أقعد جنبها كل يوم وأزن في ودانها: “يا بنتي افهمي! رجعيله الولد، خليه يتحمل مسؤوليته ومصاريفه.. خليه ينكد عليه وعلى عروسته الجديدة بدل ما هو عايش مرتاح وأنتي هنا شايلة الهم ومكسورة الجناح!”
لكن بنتي مسكت في الولد وقالتلي بدموع: “انتي بتقولي إيه يا أمي؟ ده الولد ده هو اللي طلعت بيه من الدنيا! أرميه لمين؟ ده حتة مني ومش هسيب طليقي يربيه ولا أهله يذلوه زي ما ذلوني!”
حاولت معاها باللين والمسايسة، ولما غلبت، بقيت أضغط عليها بظروفنا وعيشتنا. قولتلها بصريح العبارة: “أنا معنديش مصاريف تكفيكم أنتوا الاثنين! أنا عايشة بقرشين المعاش وما أقدرش أصرف على طفل صغير، المصاريف بقت غالية وأنا محلتيش حاجة!”
لقيتها بصلتي بنظرة وجعت قلبي، وقالتلي بحزن وبصوت مكسور: “خلاص يا أما أنا هنزل أشتغل وربنا يوسعها علينا وما أكونش تقيلة عليكي.”
اتعصبت وصرخت في وشها: “ولما تروحي شغلك هتسيبيهولي أنا ولا إيه؟ انتي شايفاني قادرة أشيل نفسي؟ أنا ركبي وجعاني ومش قادرة أخلي بالي من عيال ولا أجري ورا عيل عنده ٣ سنين!”
دمعت وقالتلي: “هاخده معايا يا أمي.. متشليش هم حاجة.”
صعبت عليا في اللحظة دي، بس رجعت قولت لنفسي: “سيبها تتعب.. يمكن لما تتهد في الشغل توافق وترجع الولد لأبوه وتخلص من الشيلة دي.”
وراحت فعلاً اتفقت مع صاحبة عمرها، وصاحبتها دي توسطت لها واشتغلت معاها في مشغل خياطة. بقت تصحى بدري، تشيل الولد وتاروح بيه المشغل. كانت ترجع بالليل مهدودة، ضهرها مكسور من الوقفة، والولد ينكد عليها ويعدي اليوم بعافية. وصاحبة المشغل شرطت عليها: “إياكي العيل ده يبكي ولا يطلع صوت، ولو عمل قلق هقطع عيشك وعيش صاحبتك!”
كانت عايشة في تعب، طالعة نازلة بالولد، بس كانت ساكتة وصابرة، وبدأ الموضوع يهدى شوية لحد بعد عدتها ما خلصت.
اتقدم لها عريس.. راجل ميسور ومحترم، بس كان ليه شرط واحد قالها: “أنا عايز نعيش لوحدنا، ومش عايز عيل تاني يتربى في بيتي.”
أنا قولت خلاص الدنيا هتتعدل! بس اتفاجئت بيها بترفض وبمنتهى البساطة بتقول: “مش هسيب ابني.. ومش هبدي راجل في الدنيا على ضنايا!”
هنا العقل طار مني، وبقيت أزعق فيها وأصرخ: “ده رماكي واتجوز وعايش حياته ومتهني! انتي كمان ارميله ابنه وجوزي وشوفي دنيتك! هتضيعي شبابك عشان عيل بكره يكبر ويسيبك؟!”
لكن هي كانت رافضة تماماً ومش راضية تسمع. لما لقيت كل محاولاتي فشلت، العصبية عمتني وحلفت لها: “لو مودتهوش لأبوه ورجعتي لعقلك، ما أنتي قاعدة معايا في البيت ده دقيقة واحدة! شيلي شيلتك وروحي دوري لك على مكان تاني!”
البنت اتصدمت.. بصتلي بصة عمري ما هنسى كسرتها، وبكت بكاء يقطع القلب، ودخلت أوضتها وقفلت على نفسها وما ردتش بكلمة.
تاني يوم الصبح بدري، قامت بنتي عشان تجهز وتروح المشغل، وكان الولد في إيدها. وقفت في طريقها وقولتلها بصوت ناشف: “استني عندك.. انزلي هاتي عيش من الفرن اللي على أول الشارع عشان ما عندناش عيش للفطور.”
لسه بتاخد الولد في إيدها عشان تنزل بيه، مسكت الولد وقولتلها: “سيبيه معايا هنا عشان تجري على طول وترجعي بسرعة وما تتأخريش على شغلك.”
أول ما بنتي خرجت اخدت الولد ونزلت بيه جري، أخدت توك توك وطلعت بيه على بيت أبوه.
وصلت هناك وخبطت على الباب، خرجلي طليقها وهو مستغرب. زقيت الولد في وشه وقولتله بقسوة: “أم الولد هتتجوز خلاص وجايلها عريس، خد ابنك عندك خليه يتربى في أحضانك، جوزها الجديد مش عايز عيال غريبة.”
طليقها أول ما سمع كلمة “هتتجوز” أخد الولد بحدّة وقال بغضب: “هتتجوز؟! وأنا مش هسيب ابني لراجل تاني يتربى في بيته وقولي لبنتك ما تحلمش تلمح ضفر الولد ده تاني طول ما انا عايش!”
أمه جات من جوه وقالت بغضب: “تلمح مين ده لو جات بس تتطل عليه هكسر رجلها!”
رديت عليهم ومشيت وأنا حاسة بإنها هتضطر توافق على العريس.
أول ما دخلت البيت، لقيت بنتي راجعة بالعيش، وبتبص حواليها وبتدور وسألتني بصوت مرعوب: “أمال فين ابني يا أما؟ فين الولد؟”
بصلتلها وقولتلها: “رجعته لابوه خلاص.. وهكلم العريس وأهله يجوا النهاردة.”
أول ما الكلمة طلعت من بقي.. العيش وقع من إيدها على الأرض، وجريت برة البيت، من غير ما تنطق ولا كلمة، ولا حتى تعاتبني.
نزلت جِري في الشارع، والشارع كله بيتفرج عليها، وأنا واقفة في البلكونة بقول لنفسي: “بكرة تهدى.. بكرة تفهم إن أمها كانت خايفة على مصلحتها.”
وصلت بيت طليقها، طرقت على الباب بكل قوتها، وطلعت لها حماتها السابقة وبصت لها بقسوة وقالت لها: “جاية ليه؟ عايزة ابنك؟ الولد خلاص بقى في حجر أبوه ومفيش رجوع.”
بنتي ما استسلمتش، مسكت في أكرة الباب وصرخت: “رجعيلي ابني يا ظلمة! ده حتة مني، أنا اللي شيلت وكبرت وشفت المر عشان أكله لقمة!”
