قبل رمضان بيومين، سامح جه البيت وهو بيفرك إيديه بتوتر وقال لي: – “نادية يا حبيبتي.. أمي وأختي جايين يفطروا معانا أول يوم رمضان. عايز عزومة تشرف، مش عايز غلطة واحدة تخلي أمي تزعل، أنتِ عارفة طبيعتها!” ابتسمت برضا وقلت له: “من عينيا يا سامح، ده رمضان كريم والبيت بيتها!”. معركة المطبخ وصيام النهار! من الفجر وأنا واقفة على رجلي في المطبخ. الجحر كان شديد، الصيام تعبني، بس حب سامح ورغبتي إن اليوم يعدي على خير خلوني أستحمل.
عملت كل الأصناف اللي حماتي بتحبها: (محشي ورق عنب، بطة محمرة بالبرتقال، شوربة لسان عصفور، صواني بشاميل، وسلطات ومقبلات مختلفة). المطبخ كان بيغلي وأنا واقفة بعرق وشقايا أظبط الملح والتوابل بالريحة والتخمين عشان الصيام. قبل أذان المغرب بنص ساعة، رن جرس الباب. وصلت حماتي ومعاها أخت جوزي “سارة”. استقبلتهم بابتسامة وترحاب كبير، وبست إيد حماتي وقلت لها: “نورتي بيتك يا ماما، كل سنة وأنتِ طيبة!”. حماتي دخلت من غير ما تبص في وشي، ودخلت الصالة لفت بعينيها في الشقة وقالت بقلة ذوق: “أهو.. الشقة مكركبة برضه! إيه الريحة دي؟ جنيتي الأكل ولا إيه؟!”.
