روحت ليونس وقعدت قدامه، وقولت له بنبرة هادية ومصممة: “يونس.. أنا هروح بكرة مع المحامي للنيابة.”
يونس بصلي باستغراب وخوف: “تروحي تعملي ايه يا حور؟”
قولت له: “هتنازل عن الحق المدني بالنسبة لمجدي.. وهقول للنيابة إن مجدي اتغرر بيه من صاحبه عادل، وإننا متسامحين في شقنا الشخصي عشان خاطر صلة الرحم وعشان خاطرك أنت يا يونس.”
يونس اتسمر في مكانه، وعينيه وسعت من الصدمة: “أنتِ بتقولي ايه يا حور؟ بعد كل اللي عملوه فيكي؟ بعد ما كانوا عايزين يسجنوكي؟”
رديت عليه بدموع وابتسامة صادقة: “أنا بعمل كده عشانك أنت يا يونس.. عشان أثبت لك ولأهلك وللدنيا كلها مين هي حور اللي حماتك كانت عايزه تخلص منها. أنا أصل وطيبة ومتربية على الأصول، ومش هكون سبب في خراب عيلة أو حبس أخ.. حقي أخدته بربي وبوقفتك جنبي، لكن كرم الأخلاق هو اللي هيفضل.”
يونس بكي، وجري عليا ومسك إيدي وباسها وهو مش مصدق الكرم والأصل اللي فيا: “أنتِ إنسانة مش طبيعية يا حور.. أنتِ جوهرة ربنا رزقني بيها وأنا مكنتش عارف قيمتك! أنا فداء برجلك يا حور!”
بالفعل، ثاني يوم روحت مع المحامي للنيابة، وقدمت إقرار رسمي بالتنازل عن الشق المدني، ووضحت القاضي إن فيه صلة قرابة وإني متسامحة لوجه الله تعالى وعشان خاطر زوجي وبنتي. التنازل ده ساعد مجدي جداً، والقاضي قرر الإفراج عنه بكفالة مالية مع إيقاف التنفيذ وإلزامه بغرامة، بينما عادل صاحب شركة التوريدات لبس القضية والتزوير لإن الإيصالات والأختام كانت من شركته هو.
خرج مجدي من السجن بعد أسبوعين، وشه كان مكسور، وجسمه خاسس، وكرامته كانت في الأرض.
أول ما خرج، مكنش قادر يواجه الناس ولا يرفع عينه في يونس. حماتي استقبلته بالدموع والزغاريد، وكانت فاكرة إن المحامي هو اللي خرجه بذكائه، بس مجدي وقف قدام أمه في البيت وقال لها بصوت مكسور ومهزوم:
“متزغرديش يا أمي! متزغرديش يا أختي! اللي خرجني من السجن ومن التزوير اللي كنت هعفن فيه مش المحامي ولا شطارتك.. اللي خرجتني هي حور! حور اللي روحت أنا وأنتي نتبلى عليها ونلبسها قضية! حور هي اللي راحت للنيابة وتنازلت وقالت للقاضي أنا متسامحة عشان خاطر جوزي وصيانة لصلة الرحم!”
حماتي اتصدمت، والكلمات اتجمدت في حلقها، وبصت لمجدي وهي مش مصدقة: “أنت بتقول ايه؟ حور التنازلت لك؟”
مجدي صرخ في وش أمه والدموع في عينيه: “ايوه حور! المرأة اللي كنتِ عايزه تطلقيها وتدبيها في مصيبة، طلعت أرجل وأحسن منا كلنا! طلعت يصون شرفنا وأصلنا وأحنا كنا بننهش في لحمها! حرمت عليا دخولة بيتك يا أمي لو فكرتي تمسي شعرة منها تاني أو تتكلمي عليها بنص كلمة!”
مجدي ساب البيت وخرج، وراح لبيت يونس.. خبط على الباب بكل انكسار.
أول ما يونس فتح له، مجدي اترتمى في حضن أخوه الصغير وهو بيعيط زي الطفل، وبيستسمحه ويطلب منه العفو. ويونس حضن أخوه وبكى معاه.
مجدي التفت ليا، ووطى رَأسه للأرض وقال بصوت متقطع: “سامحيني يا حور.. أنا أسف، أنا كنت أعمى ومسحوق ورا كلام أمي وغلها.. أنتِ أختي وليكي حق فوق رأسي، ولو طلبتي عمري دلوقتي هدهولك.”
قلت له بكل رقي واحترام: “المسامح كريم يا أبو نسب.. المهم إن الحق ظهر، وإن يونس رجع له أخوه، وإن بيتي يفضل يعيش في أمان.”
افتكرنا إن القصة انتهت لحد هنا.. وإن المصائب خلاص اتفتحت واتقفلت على خير، وإن حماتي بعد الدرس القاسي ده والتضحية اللي عملتها هترجع لعقلها وتستحي من نفسها وتطلب العفو..
لكن الحقيقة كانت أبشع بكثير!
حماتي لما لقيت إن ابنها الكبير مجدي انقلب عليها وراح يترجى حور ويسامحها، وإن الشارع والعيلة كلهم بقوا شايفين حور ملاك وأصل وطيبة وهما الخاينين الأشرار، العظمة والغل في قلبها اتضاعفوا مية مرة!
الغل أتحول لمرض عُضال.. وحماتي قررت تنفذ آخر كارت عندها، كارت مش هيخرب البيت بس.. ده كان كارت هيدمر حياة يونس بالكامل، وهيدفعه إنه ياخد قرار مجنون وهيغير مجرى حياتنا كلنا للابد!
في ليلة جمعة، وبعد شهر من الهدوء الزائف.. جرى حادث في بيت حماتي هز المنطقة كلها، وتليفون يونس رن في نص الليل وصوت المستشفى بيقول له: “الحق يا أستاذ يونس.. والدتك في العناية المركزة بين الحياة والموت، وسايبالك جواب موجه ليك باسمك قبل ما تشرب السم!”
#الكاتب_رومانى_مكرم_روميو
يونس طار على المستشفى زي المجنون، ورجله مش شايلاه من الرعب. وصل للعناية المركزة ووشه أسود زي الطين، وأنا ومكة وراه، ومجدي كان واقف هناك يلطم على وشه ودموعه مغرقة الأرض.
الدكاترة كانوا داخلين طالعين بيجروا، والمغسلة وغسيل المعدة شغال، والجو كان يتكتك من الخوف. الظابط بتاع المستشفى قرب من يونس واداله جواب مقفول بدمها، وقال بحزم: “المريضة سابت الجواب ده قبل ما تفقد الوعي، والمحضر اتفتح بإنها محاولة انتحار بمادة سامة.”
“لو مت يا يونس، فدمي في رقبة حور! هي اللي كرهتك فيا، وهي اللي خلت مجدي ينقلب عليا، وهي اللي خلتني أعيش مكسورة ومطرودة قدام الشارع والعيلة. أنا مش هعيش وأشوفك في حضنها وهي منتصرة عليا. يا تطلقها وتغسل عاري، يا تمشي في جنازتي وأنت مغضوب عليك ليوم الدين.”
يونس قرأ الجواب، ووقع على الأرض في الصالة، بيشهق بحرقة ويدق رأسه في الحيطة: “ليه يا أمي؟ ليه عايزه تدمريني حياً وميتاً؟ ليه بتحطيني بين نارين، نار موتك ونار خراب بيتي؟”
مجدي مسك يونس وزعق فيه وهو بيعيط: “أنت لسه بتفكر؟ أمك بتضيع يا يونس! أمك بتموت بسببه القهرة! لو أمك جرى لها حاجة، الدنيا كلها هتقول إننا موتناها عشان خاطر حور! طلقها يا يونس.. طلقها وأخلص من الكابوس ده لو بتفكر في أمك!”
أنا كنت واقفة ومصدومة، شايفة الراجل اللي بعشقه وبصونه بقالي سنين بيتحرق قدامي. حماتي استخدمت أوسخ وأشرس سلاح في الدنيا.. سلاح الابتزاز بالمرض والموت! حطت ابنها في الزاوية اللي ملهاش مخرج؛ يا يبيع شرفه ومراته اللي نصروه وأنقذوا أخوه، يا يعيش العمر كله شايل ذنب أم ماتت وهي بتدعي عليه بالرخص والقطيعة.
قربت من يونس، ونزلت على ركبي قدامه في الصالة، مسكت وشه بإيديا الاتنين، ودموعي نازلة في صمت.
بصيت في عينيه وقولت له بنبرة هادية كالصخر، بس مكسورة من قاع قلبي:
“يونس.. أنزل بصلي. أنا بحبك.. وعشقتك، وصنتك في غيابك وحضورك، وسكت على الدهب، وسكت على الفلوس، وتنازلت لأخوك عن حوريتي وحقي علشان عينيك.. بس لحد هنا، وكرامتي خط أحمر.”
يونس بصلي برعب وقال: “حور.. أنتي بتقولي ايه؟”
