
رجعت شقتي.. الشقة اللي بقت ملكي رسمياً بحكم المحكمة. غيرت قفل الباب، وغيرت عفش الأوضة الكبيرة بالكامل وجبت عفش جديد أبيض يفتح النفس.
قعدت في البلكونة في هدوء الليل، بسبح وبدعي ربنا إنه كان معايا وما سابنيش.. كنت عارفة إن الصفحة القديمة اتقفلت للأبد، وإن نادية الضعيفة المكسورة ماتت واندفنت، وزهزت مكانها ست جديدة، حرّة، قوية، وما بتسمحش لأي حد في الدنيا يكسرها تاني.
مرت ثلاثة أشهر على صدور الحكم، وكانت الحياة بدأت تأخذ مجراها الجديد. اللي كانت في يوم من الأيام ساحة لإهانتي، بقت مكاني الخاص المعزول عن كل وساخة الماضي. غيرت الديكور بالكامل، دهنت الحوائط بألوان دافية، ومسحت كل أثر لنهى وفوزي وأمه من المكان.
رجعت لرجلي في شركتي، وبسبب اجتهادي وتركيزي الصارم بعد ما زال الهم عن صدري، اترقيت لمسك إدارة الحسابات بالكامل. بقى لي كياني واستقلالي المادي، وأهلي اللي كانوا خايفين عليا في الأول، بقوا يبصولي بفخر واعتزاز.. نادية اللي كانت “معندهاش ضهر” بقت هي الضهر لنفسها ولغيرها.
بس الدراما مكنتش انتهت.. كانت بس بتهدى عشان تفرقع من جديد.
في يوم أربع، ورجعت من شغلي على الساعة خمسة، لقيت جارتي أم أحمد طالعةجري على السلم ووشها متخطف:
“الحقي يا نادية يا بنتي! خالتك وأختها حماتك القديمة حاطين كرسيين وقاعدين قدام باب شقتك من الضهر، ومعاهم عيل صغير في لفافة!”
وقفت على السلم، وضغطت على إيدي بقوة. نفست نفس عميق، وطلعت السلم بخطوات متزنة وواثقة.
أول ما وصلت الدور بتاعي، لقيت المنظر: حماتي السابقة خالتي قاعدين على الأرض جنود مكسورة، وفي حضن خالتي المولود الصغير.. ابن فوزي ونهى، اللي اتولد في مستشفى السجن وخرج بعد ما أتم شهره الأول عشان أمه محبوسة وما تنفعش ترعاه جوة!
أول ما حماتي شافتني، قامت بلهفة ودراعاتها اترعشت، ووشها المليان تجاعيد ودموع كان بيصرخ بالانكسار:
“نادية.. يا بنتي يا نادية! الشارع أكلنا يا بنتي.. الحكومة حجزت على بيت فوزي عشان التعويضات والقضايا، ونفذوا الحجز على أثاث شقتي عشان ديون فوزي للمحامين.. إحنا اترمينا في الشارع بالطفل ده!”
خالتي قربت وهي شايلا الولد بقلة حيلة:
“الولد هيموت من البرد يا نادية.. نهى في بتتقطع عليه، وفوزي جوة زي ، وإحنا ملناش غير ربنا وثم أنتِ! خدي الولد عندك.. ربيه يا نادية، أنتِ قلبك كبير وعمرك ما كنتِ قاسية!”
بصيت للطفل الصغير.. حتة لحمة حمراء مالهاش أي ذنب في القرف اللي عملوه كبار العيلة. بس في نفس اللحظة، افتكرت لما كنت بنزف وإبني بيقع مني، وافتكرت حماتي وهي بتقولي “نامي في الأطفال أو على الكنبة”، وافتكرت نهى وهي بتبصلي بابتسامة النصر الخبيثة وتطلب شوربة فراخ بلدي عشان تهبط بعد الكشف!
وقفت قدامهم ببرود شديد، وحطيت إيدي في جيوب البالطو بتاعي:
“تاني يا خالتي؟ جايين تسيبولي أمانات تاني في رقبتي؟ مش نهى وبطنها كانوا أمانة في رقبتي برضه؟”
حماتي نزلت على ركبتها تحت رجلي قدام باب الشقة.. الست اللي كانت بتمشي تتنطط وتتكبر عليا، نازلة تتوسل تحت جزمتي:
“سامحيني يا نادية.. ابوسي إيدك وسامحيني! أنا اتعاقبت، والله العظيم اتعاقبت وخسرت كل حاجة.. ابني في السجن، ونهى في السجن، وشتات العيلة على كل لسان.. بلاش ترمي الطفل ده، ده لحم جوزك القديم!”
رديت بصوت حاسم يقطع العشم:
“ده مش لحم جوزِي، ده لحم والمكر! والولد ده ليه جدة وليه خالة وليه أهالي، أنا مش ملزمة أربي عيال الناس اللي دمروا حياتي وحاولوا يرموني في الشارع! أنتِ فاكرة إن بدمعتين على الباب هنسى اللي شربتوهوني؟”
طلعت تلفوني من الشنطة وبدأت أطلب رقم.
حماتي صرخت برعب: “بتتصلي بمين يا نادية؟ بلاش النيابة تاني أبوس إيدك!”
ـ “بطلب الشؤون الاجتماعية والرعاية النفسية للطفل.. وبطلب دور الرعاية الاجتماعية ييجوا يستلموا الطفل بشكل رسمي ومحترم، طالما جدته وأهل أمه غير قادرين على رعايته وماديّاتهم ما تسمحش! ده الحل القانوني والإنساني الوحيد اللي هقدمه للطفل ده، غير كده.. دي مقفولة في وشكم للابد.”
خالتي صرخت: “تبعتي ابن اختك الملجأ يا نادية؟”
ـ “أحسن ما يتربى في بيت مليان غل وتزوير وخيانة ويدفع ثمن أفعالكم لما يكبر! أنتم اللي بعتوه من يوم ما فكرتم في اللعبة القذرة دي!”
بعد نص ساعة، وصلت عربية الرعاية الاجتماعية بناءً على البلاغ اللي قدمته بوجود طفل يعاني من إهمال الأسرة وعدم وجود مأوى ثابت. نزل الموظفين وشافوا الوضع، وأخدوا أقوال حماتي وخالتي اللي كانوا بيبكوا بقلة حيلة وبدون أي مخرج. الموظفة أخدت الولد بعد ما أثبتت حالة العجز المالي والسكني لجدته.
قبل ما يمشوا، حماتي بصتلي بعيون فاضية من كل أمل وقالت:
“أنتِ مش بني آدمة يا نادية.. أنتِ حجر!”
بصيت لها وابتسمت ابتسامة هادية جداً:
“أنا بقيت حجر.. عشان أنتم اللي طرقتم عليه لحد ما اتصلد.. امشي يا حماتي ودوري لكِ على مكان يلمك أنتِ وأختك، لأن الزمن دار، والخدامة هي اللي قفلت الباب في وشكم.”
دخلت شقتي وققلت الباب بالمفتاح.. الصمت كان يعم المكان، بس المرة دي كان صمت نقي، خالي من أي ذنب أو تأنيب ضمير.
عدت شهور ثانية..
وفي يوم من أيام الشتاء، وأنا قاعدة في مكتبي بالشركة، جالي إخطار من المحكمة بصفتي المدعية في قضية التعويضات ضد فوزي. الإخطار كان بيبلغني إن فوزي قدم طلب للمحكمة يترجى فيه مقابلتي في السجن لرغبة حثيثة في تقديم تنازلات مالية جديدة مقابل تنازلي عن باقي القضايا المدنية المرفوعة عليه.
رفضت في الأول، بس المحامي حازم قال لي: “روحي يا مدام نادية.. اسمعي هيقول إيه، وممكن يستسلم ويفرط في باقي أملاكه المستترة لصالحتك من غير ما نطول القضايا في المحاكم.”
وافقت.. وذهبت لمستشفى وسجن طرة في ميعاد الزيارة.
قعدت ورا لوح الزجاج الفاصل، وما هي إلا دقائق لحد ما الباب الاتفتح، ودخل فوزي.
المظهر كان صدمة بجد..
راجل مسلول، وشه أصفر، شعره شاب كله، ولابس الهدوم الزرقاء الدبلانة. عينيه كانت حزينة ومكسورة لأقصى درجة.
قعد على الكرسي قدامي، ومسك السماعة بإيد بتترعش. مسكت السماعة بتاعتي وحطيتها على أذني ببرود.
صوته جه ضعيف ومخنوق:
“أهلاً يا نادية.. شكراً إنك جيتي.”
رديت بجمود: “خير يا فوزي؟ المحامي قال إن عندك كلام مهم في القضايا.”
سكت شوية، والدموع جرت في التجاعيد اللي ظهرت في وشه فجأة:
“أنا ضعت يا نادية.. أمي بتشحت في البيوت هي وخالتي، والولد في الدار، ونهى اتجننت جوة سجن النساء وبتتعالج نفسياً.. وأنا هنا محبوس وأهلي اتفضحوا وسيرتنا بقت على كل لسان.. أنا باخد جزاء كل لحظة قسوة قسيتها عليكِ.”
ما حركتش ساكن، وسيبته يتكلم.
كمل وهو بيلطش إيده على الزجاج:
“أنا مستعد أكتب لك باقي أراضي الصعيد اللي باسمي، ومستعد رسمياً وأسيب لك كل حاجة، بس تنازلي عن قضية التعويضات عشان أخرج لما أخلص نص المدة.. أنا بموت هنا كل يوم ألف مرة يا نادية! ارحميني الله يخليكي!”
قربت من الزجاج، وبصيت في عينيه بثبات وقلت بصوت واضح:
“أنت فاكر إن الأراضي والفلوس هترجع لي صحتي اللي راحت وأنا بنزف وأنت بتهزأني؟ فاكر إن الفلوس هتمسح منظر إيدك وهي بتربط الشوز لنهى قدام عيني وأنا محروقة؟ أنت يدوب بتدفع ثمن بسيط أوي من اللي عملته.. والأراضي والأملاك دي هاخدها بالقانون بحكم المحكمة، مش بجميلتك ولا بتنازل منك.”
فوزي بكى بصوت عالي: “طب والطفل يا نادية؟ الطفل ده مالهوش ذنب!”
رديت عليه بثقة:
“الطفل ده هيتربى بعيد عنك وعن نهى وعن أمك.. هيتربى نضيف، يمكن ربنا يكتب له حظ أحسن من حظك.. أما أنت، فتقعد جوة وتكمل مدتك للنهاية، عشان تتعلم إن دعوة المظلوم ملهاش حجاب.”
حطيت السماعة مكانها، وقمت وقفت.
فوزي كان بيخبط على الزجاج وبيصرخ باسمي وبيعك بدموعه، بس أنا ما تلفتش ورايا ولا خطوة.
خرجت لشمس النهار الشديدة، ونفست الهواء النقي.. الحساب قرب يكتمل، والقصة ماشية لنهايتها المحتومة اللي كتبتها بإيدي.



