الحفلة حمادة هيكل

صديقة مراتي عزمتنا على حفلة عيد ميلاد بنتها مرام اللي عندها 7 سنين الساعه 8 كنا وصلنا العمارة طلعنا الدور الرابع رنيت جرس الباب وبعد كام دقيقة فتحت لينا مدام أسما رحبت بينا ودخلنا أهلا بيكم نورتوا كان لسه مفيش ضيوف وصلوا غيرنا بس كان في اجواء عيد ميلاد زينة متعلقة وبلالين واغاني أطفال شغالة

 

كان في شغالة واقفه طلبت منها تجيب مشروب

حاضر يا مدام

وجهت كلامها لزوحتي

زينب وحشاني أوي ..فينك من زمان

انا موجوده اهو ..بس معلش شغل البيت

والولاد ..انتي فاهمه بقى

ربنا يعينك ..بس انتي ليكي فترة متصلتيش

صدقيني الفون وقع مني وضاعت كل الارقام معاه

اها عشان كدا كل ما بتصل بلقاه مقفول

المهم طمنيني عليكي يا اسما

الحمدلله احنا بخير ..سافرت فترة مع جوزي

بره مصر ..بس متحملتش الغربة وقررت انزل

مع مرام ونسيب باباها هناك ..بينزل مرتين اجازه في السنه

رجعنا من 8 شهور ..حاولت اوصلك كتير معرفتش

بس

جبت رقمك من زميلتنا أميرة ..فاكراها

اه طبعا فاكراها ..هي اخبارها ايه

فضلوا يحكوا مع بعض عن ذكرياتهم في الثانوي

والجامعه واد ايه انهم مفتقدين للمة الصحاب

زي زمان والجو دا ..

أسما كانت نفس سن مراتي ..المفروض

عمرها 43 سنه ..بس ملامحها تقول انها

أصغر من كدا بعشر سنين ع الاقل

وكأنها متجاوزتش ال 30 سنه!!

كنت مستغرب جدا ..معقول علامات السن مش باينه عليها

كدا ..وازاي مراتي مخدتش بالها ولا يمكن خدت بالها

ومش عايزه تلفت انتباهي ..غيرة ستات مثلا

الحقيقه مش فاهم

الساعه عدت 9 ومفيش ضيوف وصلوا

هو حضرتك مش عازمه حد غيرنا ولا ايه !

لا عازمه طبعا ..بس في ناس عندها ظروف واعتذروا

ممكن بعد اذنك ادخل البلكونه اولىع سيجاره

اه طبعا ..مع عمو يا مرام

اتفضل

مشيت وراها

اتفضل يا عمو

شكرا يا حبيبتي

ولىعت السيجارة ووقفت جنبي ومدخلتش

قوليلي بقى انتي في سنه كام

انا

ايوه ..انا المفروض مخلصة جامعة

هههه ضحكتيني

بتكلم جد

جد أزاي انتي كام سنه

قربت مني وقالت

على فكرة انا معجبه بيك

نعم

رققت صوتها اكتر ورفعت شعرها

وقالت

انا معجبه بيك يا شريف

ايه اللي انتي بتقوليه دا انتي اتجننتي

ايوه انا بحبك بجنون ..وشايفه اني أحق

بيك منها

من مين

من زينب

لا انتي شكلك مش طبيعيه

انا هنده لك ماما عشان تشوف شغلها معاكي

يا أسما…مدام اسما

هي مش بترد ليه

ماانا قدامك أهو

ألتفت لورا لقيت البنت ملامحها اتغيرت

جسمها كبر ..طولت بقت نسخه من اسما

لكن بسن وحده تعدي الأربعين سنه

وقفت مذهول وانا مش مصدق اللي بيحصل

طب ازاي

شريف انا بحبك من زمان وجوازي من أيمن

كان غلطه او كان محاولة لنسيانك

لأنك كىسرتني وقت ما فضلت عني زينب

رغم اني اجمل واذكى

منها والأهم اني بحبك أكتر منها

بس دي غلطتى اني محاولتش اقولهالك صريحه

رغم اني كنت بلمح لك اوقات ..لكن زينب كانت شاغلاك

انا مش فاهم حاجه انتي اسما ولا مين

ومين الست الي كانت بره دي

وفين الطفلة اللي كانت معايا هنا في البلكونه

مفيش حد بره أصلا ..ولا حتى مراتك

يعني ايه

تقدر تقولي وانتوا جاييين هنا ركبتوا ايه

انت فاكر اصلا جيتوا هنا أزاي

احنا كنا .. احنا !!

ها

مش فاكر أنا جيت هنا أزاي !!

كل اللي انا فاكره ان زينب كلمتني

ع الموبايل وقالت وانا راجع من الشغل

اننا معزومين على عيد الميلاد و..

وايه

وبس

!!