ليلة زفافي
وساعتها سابتنا ودخلت أوضتها بعد ما غيرت لي دماغي من تاني وبدأت أدور كلامها في دماغي،، معقول مايكونش في حاجه من الكلام دا حقيقية ومافيش حاجه بين محمد ورباب وكل دا حوار عشان فعلا أغضب على محمد واطرده خاصة إنه واضح انهم مابيطيقوهوش
كل شوية الحكاية كانت بتتعقد في دماغي لغاية تاني ليلة لما روحت شىقة رباب وقعدت معاها هي وأمها،، ماكنتش راضي اتكلم قدام رباب اللي كانت لسه جروحها اللي جرّحت بيها نفسها ليلة الدلة لسه مادبلتش وكان تحت عينيها لسه أسود ووشها أصفر ومخطوف فصبرت لما دخلت نامت وبعدها فاتحت امها في الموضوع
_الا قوليلي يا ام رباب،، هو محمد ابني كان عينه من رباب بنتك قبل ما اطلب انا ايدها؟!
ساعتها حسيت ان وشها اتغير،، لكن ردت وقالت
=مين اللي قالك الكلام دا يا ابو محمد
_أهو سمعت
=بص يا ابو محمد اللي انا عارفاه كويس وانت ماتعرفوش،، ان محمد ابنك بتاع بنات ونسوان ومن زمان مش من قريب،، ومن فترة كدة حاول يميّل دماغ رباب بنتي وانا ساعتها عرفت لان بنتي مش خايبة ومابتداريش عني حاجه لاني مربياها كويس،، فجيت في يوم جيبتهاله على بلاطة وقلت له لو ليك غرض من بنتي يا ابن الحلال،، يبقى تطلب ايدها على سنة الله ورسوله فطبعا استغرب ان بنتي حكتلي،، وعشان ينسحب بشياكة جالي بعد يومين قال لي انه عرض الموضوع على الحجة ام محمد ورفضت وانتهى الكلام على كدة،، عشان يتفاجىء بعد كدة لما عرف انك خطبت رباب وهتتجوزها وساعتها كان زي التور الهايج ويتصل بيا ويتصل برباب ويهدد ويتوعد بس احنا ماحطيناش كلامه في بالنا وبطلنا نرد عليه أصلا من بعدها…
_يعني مافيش اكتر من كدة يا ام رباب
=احلف لك على مية مصحف إنه مافيش الا كدة
_طيب يا ام رباب،، كل حاجة هتظهر وهتبان…
ودخلت ساعتها عشان أبيت في نفس الأوضة اللي ببيت فيها لكن الغـ,ـريب إني لاحظت بعد كام ليلة بيات هنا ان الليالي اللي مابحاولش المس فيها رباب ماكانش يحصل معايا فيها نفس اللي حصل لي في اول ليلة يعني كنت بنام في الاوضة الصغيرة من غير ما اشوف كوابيس ولا شبطان،، وهي كمان كانت بتبات ليلتها مع امها عادي كإن مفعول السـ,ـحر دا مابيشتغلش الا لما احاول المسها..
تاني يوم وانا في الوكالة بدأت اراجع مسحوبات محمد من كام شهر،، طول عمري عارف إنه عاقل في مصاريفه ومابيجيش ع الشغل ومن زمان اوي ماراجعتش وراه لكن لما جيت راجعت وراه المرة دي لقيته في اليوم اللي قبل جوازي من رباب ساحب عشر الاف جنيه فلما خلصنا شغلنا خدته معايا المكتب وسألته
_انت كان بينك وبين رباب مرات ابوك حاجه؟؟
=والمصحف ابدا يابا،، ليه بتسأل سؤال زي ده
_امممم،، غريبه
=ليه هو في حاجه يابا
_لا مافيش
=يابا هي دلوقتي مراتك فماقدرش اتكلم عليها،، لكن انا من قبل جوازتك قلت لك بلاش نسوان السوق
_طب والعشر تلاف جنيه اللي انت ساحبهم من كام يوم دول كنت ساحبهم ليه؟؟
ساعتها اتلجلج كده وقال
=وانت من امتى يابا بتسألني على فلوس
_من دلوقتي؟؟
=كنت بعمل شوية صيانة في عربيتي
_اممم،، ماشي
كنت عارف انه بيكذب،، قريت الكذب في عينيه لكن كنت لسه بخطط عشان اعرف تفاصيل الحكاية كاملة بكل تعقيداتها،، قبل ما اخد قرار،، وكنت منتظر كلام ام عماد اللي هتجيبلي قرار الدجالين اللي في البلد واللي لما رجعتلي قالت لي إنهم انكروا ان حد فيهم يكون عمل حاجه ل رباب،، وكالعادة طلبوا واحد ورا التاني انهم يزوروها لكن انا كنت رافض بردو امشي في السكة دي..
لكن بعد يومين تلاته ولما لقيت الواد اللي موصيه يقطر محمد ويجيبلي كل تفاصيل حياته ماجابليش اي تفاصيل قلت في بالي أكيد مولس معاه وبيداروا عليا!!
ازاي ماجاش الخاطر دا في بالي؟!
وساعتها وصيت عيل غريب عن الوكالة بانه يتابع محمد ويطقس عن اخباره وفي نفس الوقت الواد الاولاني ماحسستوش اني شكيت فيه عشان يفضل حاسس بالامان هو ومحمد
عشان بعد اربع ليالي بالظبط يجيبلي الخبر اليقين…
محمد ابني في الليالي اللي ببيت فيها في الدار مع امه كان بيروح يخرج مع اصحابه وفي الليالي اللي كنت بروح ابيت فيها عند رباب كان بيروح شىقة بتاعتنا سايبينها مقفوله من زمان في غرب البلد،، ومايرجعش من هناك الا وش الفجر..
وبعد ما عرفت بالحكاية دي وفي ليلة بياتي عند رباب روحت عندها كأني هبيت هناك عادي وبعد نص ساعة نزلت من باب المندرة الوراني عشان لو كان محمد موصي حد يراقبني ويراقب عربيتي اللي راكنه قدام الدار
عند باب المندرة كان واقف الواد اللي جابلي قرار محمد بعربية منتظرني وروحنا على الشىقة اللي بيروحها محمد…
وهناك طلعنا لغاية باب الشىقة وخليت الواد وقف بره وفتحت الباب بهدوء
